የአዳማ ከተማና አካባቢዋ ወጣቶች ODP ያሳለፋቸውን ውሳኔዎች በመደገፍ ሰላማዊ ሰልፍ አደረጉ

መስከረም 13፣ 2011

የአዳማ ከተማና አካባቢዋ ወጣቶች ODP ያሳለፋቸውን ውሳኔዎች በመደገፍ ሰላማዊ ሰልፍ አደረጉ

በሀገሪቷ የተጀመረውን ለውጥ ከግብ ለማድረስ ከODP (ኦሮሞ ዴሞክራቲክ ፓርቲ) ጎን በመሆን የበኩላቸውን አስተዋፅኦ ለማድረግ መዘጋጀታቸውን የአዳማ ከተማና አካባቢዋ ወጣቶች በድጋፍ ሰልፍ ገለጹ።

ወጣቶቹ ODP በ9ኛ ጉባኤው ላሳለፋቸው ውሳኔዎች ድጋፋቸውን ለመግለፅና ለውሳኔዎቹ ተግባራዊነትም ከፓርቲው ጎን በፅናት እንደሚቆሙ ለማረጋገጥ ዛሬ በአዳማ ከተማ ደማቅ የድጋፍ ሰልፍ አድርገዋል።

በድጋፍ ሰልፉ ላይ ከተገኙት ወጣቶች መካከል ወጣት ሀብታሙ ብርሃኑ እንደገለጸው ባለፉት ጥቂት ዓመታት በሀገሪቷ ሁሉን አቀፍ ለውጥ እንዲመጣ ወጣቶች በግንባር ቀደምትነት ታግለዋል።

“ዛሬ የተገኘው ሃሳብን በነፃነት ማራመድ፣ ዴሞክራሲ፣ እኩልነትና ፍትህ በፅኑ መሰረት ላይ እንዲቆም፣ የተጀመረው ለውጥ እንዳይደናቀፍና ለውጤት እንዲበቃ መረባረብ አለብን” ነው ያለው ወጣቱ።

የድጋፍ ሰልፉ ODP ወቅቱ የሚጠይቀውን ትግል ለማካሄድና ለውጡን ወደ ፊት ለማራመድ በሚያደርገው ሁሉን አቀፍ እንቅስቃሴ ውስጥ ከጎኑ ለመቆምና ለማገዝ ያለንን አጋርነት ለመግለጽ ጭምር ነው ብሏል።

በአሁኑ ወቅት ቄሮዎች፣ የተለያዩ የአገሪቱ ወጣቶችና መላው ህዝብ ባደረገው ትግል የመጣውን ለውጥ ለመቀልበስ የሚደረገውን ፀረ ሰላም እንቅስቃሴ ከODP ጎን በመቆም ለመመከት እንደሚሰሩም ተናግሯል ።

“ሰሞኑን በቡራዩና አዲስ አበባ አንዳንድ አካባቢዎች የታየው አፍራሽ ተግባር ለሰላም የታገለውን  ወጣት አይወክልም፤ በጥፋት ቡድኖች የተሸረበ ሴራ ነው” ያለው ደግሞ ወጣት ባይሳ ዋቅሹማ ነው።

በቄሮዎችና በሀገሪቷ መላው ወጣቶች ግንባር ቀደም ትግልና መስዋዕትነት የመጣው ለውጥ እንዳይቀለበስ በመከላከልና በODP 9ኛው ጉባኤ የተላለፉ ውሳኔዎችን በመተግበር ኢትዮጵያንና የኦሮሚያን ክልል ወደ ተሻለ ምእራፍ ለማሸጋገር ዝግጁ መሆኑን አረጋግጧል።

“ወጣቶች ወሳኝ የለውጡ አካል እንደመሆናችን በትግላችን ያገኘነውን ዴሞክራሲያዊ አንድነት፣ ነፃነት፣ እኩልነትና ፍትህ በመላ ሀገሪቱ እንዲረጋገጥ የአፍራሽ ኃይሎች የጥፋት መሳሪያ ከመሆን ተቆጥበን የድርሻችንን እንወጣለን” ብሏል።

ሌላኛው አስተያየት ሰጪ ወጣት ድንቁ ቁንቢ በበኩሉ በአሁኑ ወቅት  ቄሮዎችን ሽፋን በማድረግ እየተፈፀሙ ያሉት የጥፋት ተግባራት እንደማይወክሉን ሁሉም የክልሉ ወጣቶች ተገንዝበው ለለውጡ ውጤታማነት ከመንግስት ጎን በመሆን በአንድነት መስራት እንደሚገባ አመልክቷል።

“ለውጡን ወደኋላ እንዲመለስ የሚጥሩ ኃይሎች በዋናነት መሳሪያ የሚያደርጉት ወጣቶችን ነው” ያለው ወጣት ድንቁ፣ ይህ ደግሞ የተጀመረውን ሀገራዊ የአንድነት ጎዞ የሚያደናቅፍና የሚያጨልም በመሆኑ ሁሉም ሊታገላቸው እንደሚገባ አሳስቧል።

መጨረሻውን በአዳማ ከተማ አበበ ቢቂላ ስታዲዮም ባደረገው የድጋፍ ሰልፍ ላይ የተገኙት የODP ማዕከላዊ ኮሚቴ አባል አቶ መስፍን አሰፋ “ወጣቱ አንድነቱን ይበልጥ በማጠናከር፣ በመደማመጥና በመተባበር የተጀመረው አዲስ የለውጥ ጉዞ ለውጤት እንዲበቃ መረባረብ ይጠበቅበታል” ብለዋል።

ODP በጅማ ያካሄደው ዘጠነኛ ጉባኤ ፓርቲው ሀገሪቱ አሁን የደረሰችበትን ሁሉን አቀፍ ፖለቲካዊ፣ ማህበራዊና ኢኮኖሚያዊ እንቅስቃሴ ወደ ቀጣይ ምዕራፍ ለማሸጋገር የሚያስችል ቁመና እንዲኖረው ማስቻሉን ተናግረዋል። ጉባኤው አዲስ የትግል ስልት የተቀየሰበትና ውሳኔዎች የተላለፉበት ጉባኤ መሆኑንም ነው የጠቆሙት።

ቄሮዎችና መላው የክልሉ ወጣቶች የተጀመረው ለውጥ እንዳይቀለበስና ለውጡን በአስተማማኝ መሰረት ላይ ለመገንባት በፓርቲው የተላለፉትን ውሳኔዎችና የትግል ስልቶች ማገዝ እንዳለባቸው አስገንዝበዋል።

“በሀገሪቱ ፍትህ፣ እኩልነትና ዴሞክራሲያዊ ሥርዓት ዘላቂ በሆነ ሁኔታ እውን እንዲሆን አብረን መስራት ይገናባል” ብለዋል።

በአዳማ ከተማ ዛሬ በተካሄደው የድጋፍ ሰልፍ ላይ ከአዳማ ከተማና አካባቢዋ የተወጣጡ በሺዎች የሚቆጠሩ ቄሮዎችና የተለያዩ የህብረተሰብ ክፍሎች ተሳታፊ ሆነዋል።

ምንጭ፡- ኢዜአ

banner ad

Leave a Reply

Your email address will not be published. Required fields are marked *